الأحد، 4 مارس 2012

طريقة عمل سمك محشي مشوي وجمبري مشوي في الفرن بالصور

طريقة عمل سمك محشي مشوي وجمبري مشوي في الفرن بالصور 
 
المقادير
سمك بلطى الكميه اللى تحبيها ويكون متنضف ومنزوع القشور ...جمبرى حجم كبيربس مش كبير اوى اوى يعنى
ندخل بقى على مقادير التتبيله
لتتبيل السمك
فلفل احمر وقرن فلفل اخضر حامى وراس توم وملح وكمون وكزبره مطحونه وخل وليمون ومسطرده

لعمل الجمبري 


توم وليمون وكمون وخل وملح وكزبره مطحونه ومسطرده وقرن واحد فلفل اخضر حامى وقرن واحد فلفل احمر حامى(يعنى الفرق بينها وبين تتبيلة السمك اننا مش هنكتر الفلفل فيها)


ولحشو السمك 


حزمة كزبره خضره مفرومه بالسكينه وحزمة كرفس مفروم بالسكينه وجزر مبشور وطماطم مخرطه مكعبات وبصل مخرط مكعبات وكام فص توم مخرط حلقات بالسكينه وقرنين فلفل حامى ولعه نار وكل ده هنرش عليه ملح وكمون وليمون وكزبره مطحونه


طريقة عمل 


الصوره دى فيها كل المقادير متجهزه وطبعا المقدار اللى فى الصنيه لشوى الجمبرى والمقدار اللى فى الكبه لشوى السمك ملاحظه الفرق فى اللون



وفى الصوره دى لاحظى انى حاطه اعواد الخله فى اقرب جزء من راس الجمبريايه علشان تبقى ماسكه نفسها وهى بتششوى وكمان لما هتتحط على صاجة الشوى هتمسك نفسها اكتر

وكمان عاوزاكى تراعى مقاس الجميرى فى الخله ليه بقى يعنى لو حطيتى جمبريايه كبيره وجمبريايه صغيره

الصغيره مش هتطول الصاجه بتاعة الشوى وهتبقى نيه
فى الصوره دى هاخد من الخلطه الحمرا اللى كلها فلفل احمر مفروم وابتدى اتبل السمك من جوه وبره



وهنا هقلب صنية الحشوه واخلطها ببعض كويس


وهنا هحشى السمك.. واحشيه كويس واكتر من الحشو كده لانه بيبقى طعمه روعة

وهنا هرص السمك المحشى فى صنيه وتكون مدهونه زيت وفرشه فى الصنيه كزبره خضرا متقطعه بحجم كبير
يعنى الحزمه مقسمه على اتين او تلاته حسب طول الكزبره وكمان فى الصوره دى الكزبره قليله شويه ابقى انتى كترى منها فى الصنيه بحيث تكون متغطيه
وهنا بقى هدهن السمك مسطرده من الناحيتين وقبل ما ادهنه بالمسطرده اعصر عليه 2 ليمونه


وكمان هدهن فوقهم زيت على خفيف كده


وانا بدهن السمك بالمسطرده والزيت اكون مولعه الشوايه بتاعة الفرن علشان تسخن شويه وبعدها احط الصنيه تحت الشوايه علشان السمك يتحمر وياخد لون ..ليييييييييييييييييييييييه؟؟؟ انا بحطه وهو نى ياخد اللون علشان لما اجى اقلبه الناحيه التانيه ميتهريش يبقى انا احطه تحت الشوايه ياخد اللون الحلو وبعدكده اقلبه على الناحيه التانيه ياخد اللون الحلو وبعد كده هطفى الشوايه واولع الفرن من تحت
هنا السمك اخد لون وابتديت اقلبه بس راعى النك تقلبيه بالشياله علشان ميتهريش منك



كده احنا خلصنا السمك وراعى انك مش تخلى المايه اللى نازله منه يشربها..لالالالالالالا.... خلى شوية مايه متبقيه بيبقى طعمه جناااااااااااااااااااااان....اللى فى الطبق الصغير ده الصوص بتاع السمك يمى يمى يمى
اتفضلى يا قمر احلى سمك مشوى من غير بهدله ولا دخان وطعم روعه


تعالو بقى مع بعض نشوف الجمبرى


هنجيب الصاجه بتاعة الشوى ونفرش عليها ورقة فويل وندهنها زيت على خفيف ونسخنها كويس وبعدها نرص اعواد الجمبرى


ونقلبه على الناحيه التانيه




ونراعى اننا نضغط على منطقة الديل ونظبطها عالصاجه علشان تستوى


وكل ما نرص اعواد جديده ننقط عليها نقط زيت على خفيف

وبعدكده ناخده من الصاجه على الصنيه اللى فيها الخلطه فكرينها ولا نسيتوها

هنحط على الخلطه شوية مايه ونظبط الملح والكمون والليمون والخل ونغطس فيه االجمبرى المشوى ونقلبه فيها


كويس وبعد كده نطلعه على ورق نشاف


يالله بقى نسرفس الجمبرى هنجيب الاطباق ونفرشها بالجرجير ونرص عليها الاعواد



مصدر

0 ملاحظات:

يوميات شري   © 2008. Template Recipes by Emporium Digital

TOP