السبت، 25 فبراير، 2012

طريقة عمل المش المصري او الجبنة الحادقة في البيت بالصور



طريقة عمل المش المصري او الجبنة الحادقة في البيت



ول يا قمرات هنشترى بلاص بس يكون بلاص بتاع عسل وده تشتريه من اى واحد بتاع عسل بيدور او من السرجه ..لازم يكون بلاص عسل لانه بيدى تست حلو اوى للمش وكمان المسام بتاعة البلاص بتبقى متشبعه بالعسل ومسدوده تخلى البلاص ميرشحش السوائل اللى بنحطها فى المش..واسألى اى واحده من الريف هتقولك ان احلى مش تاكليه اللى معمول فى بلاص العسل
وادى صورة البلاص ومن جوه كمان



المقادير


5 كيلو جبنه قريش

2 كيلو لبن حليب
2 كيلو خميرة مش.... ودى بتشتريها من بياعين الجبنه القريش الكيلو منها ب 8 جنيه بعد كده مش هتحتاجى تشتريها لانك عملتى المش بقى وعندك خميره كفايه
ربع كيلو فلفل شطه حامى
ب 50 قرش شطه حاميه(بفضل الشطه السودانى)
ب1جنيه تنكار وفى ناس بتقول اسمه دنكار الاتنين صح وده بيتباع عند العطار وهو لونه بيبقى ابيض زى الملح وهو ده اللى يخلى المش مش يدود
كيس ملح
ونشوف مع بعض الصوره


هنجيب الجبنه ونرش عليها كيس الملح ونقلبه فى بعض كويس


بعد كده هنجيب كيس مخده ونحط فيها الجبنه علشان تصفى مايتها وتنشف وبعد كده نعقد الكيس ونربطه كويس فى ماسورة الستاره فى الحمام ..عن نفسى بسيبها يوم تصفى وفى ناس بتسيبها يومين او تلاته علشان تنشف اوى من ميتها


طبعا اللبن الحليب بغليه واسيبه يبرد واسيبه بالقشطه بتاعته مش بشيلها ده بيخلى المش دسم وحلو وابتدى اضيف عليه الشطه والتنكار واقلبه


بعد كده هنيجى تانى يوم نبتدى نعمل المش هنجيب البلاص ونحط فيه نص كمية خميرة المش ونص كمية اللبن الحليب المخلوط بالشطه والتنكار ونبتدى نسقط فيهم نص كمية الجبنه


وبعدكده اضيف نص كمية الفلفل الاحمر


وده شكل البلاص من جوه


ونكمل باقى المقادير بنفس الطريقه بحد ما تخلص كلها


نبتدى بقى نقفل البلاص كويس جدااااااااا علشان ميدخلش اى هوا جواه لانه لو اتعرض للهوى هيربى دود حتى لو حطه تنكار...دى الورقه اللى كان مسدود بيها بلاص العسل بدخلها فى كيس بلاستك واكبسها فى فوهة البلاص كويس



بعد كده هلبس البلاص كيس واربطه بقماشه او شريطه او دوباره المهم اربطه بحاجه جامده وخلاص


وبعد كده هلبسه كيس بلاستك تانى واحكمه كويس اوى على البلاص


وبعدكده هطبق حتة قماشه قديمه وتبقى تقيله يعنى مثلا نص ملايه اوطرحة صلاة قديمه او ديل جلابيه كده يعنى وتطبقيها اربعه وتحطيها فوق البلاص وتربطى بشريطه


بعد كده هنفرش فى البلكونه كيس بلاستك قديم ونجيب حتة قماشه قديمه مستغنيه عنها ونلفها زى الحوايه ونحط فوقها البلاص لانه ممكن فى اول الامر يرشح من تحت شوية سوائل وهتلاقى لونها اسود وده من العسل بس بعد كده هيبطل لوحده علشان البلكونه بتاعتك متتبهدلش


وهنسيبه على كده يا قمرات 6 شهور ..اقل حاجه 6 شهور ومنفتحش عليه خالص بس كل يومين تخرجى البلكونه كده وتشليه وتهزيه بشكل دائرى علشان الجبنه والمش يتقلبو من جوه وكمان هنحط عليه بلاطه من فوق اى حاجه تقيله يعنى


ملحوظه يا قمرات

البلاص لما نيجى نعبيه المش والجبنه وكده لازم ميكنش مليان يعنى يبقى نص البلاص او تلتينه مليان والباقى فاضى لان المش بيفور وبيزيد


مصدر

ونقول لكم يا قمرات مع تحيات فتكات اللى بتحبكم اوى 

 
طريقه المش عمل الاساس :
اولا نعمل مرته سمن--طريقتها:
كيلو زبده او اقل نضعها علي النار ونضع معها حوال اربع معالق ملح كبيره
نستمر في تقليبها الي ان نري لون رواسب الزبده تغير لونه الي لون الكرميل
نتركها حتي تبرد قليلا ثم نصفي السمن(الزبده المغليه)
اما الرواسب ذات لون الكرميل هي المرته
ثانيا-نقلب كوبين من اللبن الرايب او تلات اكواب من الزبادب
نقلبها مع المرته مع مرعاه ان يكون البرطمان الذي نضع فيه المرته واللبن جاف تماما
نقلب كميه معلقه كبيره من الفلفل الاحمر الحار المجفف
ثالثا- عندك الان الخميره الاساسيه للمش ضعي فيها ما يناسبك من بواقي الاجبان من الثلاجه
والجبنه الرومي يجب طحنها اولا
والجبن الاسطنبولي
بالنسبه للجبه القريش يجب قبل وضعها تركها خارج التلاجه لمده ليله وهي مغموره في كميه من الملح حتي تستخرج المياه من داخلها
يتم غلق البرطمان جيدا ووضعه في مكان جاف خارج التلاجه
وممكن وضع زيت عليه
ملحوظه
للمحافظه علي المش من التلف
احرصي علي ان تكون الاجبان الموضوعه فيه مافيهاش مياه
وان تظل فيه كميه من الفلفل الحريف مناسبه باستمرار


مصدر

0 ملاحظات:

يوميات شري   © 2008. Template Recipes by Emporium Digital

TOP